Қолсай көлдері Солтүстік Тянь-Шаньның Күнгей-Алатау жотасында 1800-ден 3500 метрге дейінгі биіктікте орналасқан. Ұлттық парк аумағы бес биіктік белдеуді қамтиды және бай биоәртүрлілігімен ерекшеленеді: мұнда 1000-нан астам өсімдік түрі өседі, оның 19-ы Қазақстанның Қызыл кітабына енгізілген, сондай-ақ 225-тен астам омыртқалы жануар түрі мекендейді.
Келушілер үшін серуендеу соқпақтары жабдықталған, катамарандар мен қайықтар жұмыс істейді. Екінші көлге ат маршрутары ұйымдастырылады. Биыл облыс бюджетінен соқпақтарды абаттандыруға 267 млн теңге бөлінді — 2022 жылмен салыстырғанда көбірек. Ұлттық парк туристерден түскен табысты аумақты жақсартуға жұмсайды.
Қайынды көлі
Келесі аялдама — 1911 жылғы жер сілкінісінен пайда болған Қайынды көлі. Оған Саты ауылынан жол талғамайтын көліктермен немесе арнайы трансфермен жетуге болады. Жыл басынан бері көлді 95 000-нан астам адам аралады.
Шарын шатқалы
Шарын шатқалы жыл сайын мыңдаған қонақты тартады. Оның тереңдігі 200 метрге жетеді, ал жекелеген жартастар 300 метрге дейін көтеріледі. Жыл басынан бері мұнда шамамен 70 000 турист болды, өткен жылы 53 елдің қонақтары келген. Аумақта визит-орталық, мейрамхана және ақпараттық стендтер жұмыс істейді. Кіру экологиялық төлемі 730-дан 1500 теңгеге дейін құрайды.
Ой-Қарағай курорты және Қонаев жағажайлары
Ой-Қарағай курорты жыл бойы қонақтарды қабылдайды. Қыста мұнда шаңғы тебеді, жазда парапланда және зиплайнда ұшады. Қонаевтағы №5 жағажайды өткен жылы шамамен 250 000 адам аралады. Жаяу жүргіншілер үшін кіру тегін, автотұрақ 1000 теңге тұрады.
Алматы облысының әкімі Марат Сұлтанғазиев жағажайларды жаңғырту жалғасатынын, Қайынды көліне апаратын жол жөнделетінін хабарлады.