«Достық» II дәрежелі орденін Еуропалық қайта құру және даму банкінің президенті Одиль Рено-Бассо, Ислам даму банкі тобының төрағасы Мохаммад Сулейман Әл-Джассер, AD Ports Group компаниясының басқарушы әрі бас атқарушы директоры Мухаммед Жума Әл-Шамиси, Citi компаниясының клиенттермен жұмыс жөніндегі бас басқарушысы Дэвид Ливингстон, Polpharma тобының бақылау кеңесінің төрағасы Ежи Старак, Cameco корпорациясының президенті Тим Гитцель және «Қазақстан шетелдік инвесторлар кеңесі» қауымдастығының басқарма төрағасы Ерлан Досымбеков алды.
«Құрмет» орденін «Қазақстан шетелдік инвесторлар кеңесі» қауымдастығының директоры Жанна Байдашеваға тапсырды.
Кеңес отырысы
Марапаттау шарасы Шетелдік инвесторлар кеңесінің 38-ші пленарлық отырысынан кейін өтті. Президент сөзінде Қазақстанның тұрақты даму бағытына адалдығын атап өтті.
Ол әлем технологиялық трансформация дәуіріне енгенін, онда жасанды интеллект жаһандық дамудың маңызды қозғаушы күшіне айналып отырғанын айтты. Қасым-Жомарт Тоқаев Қазақстан адам капиталына инвестиция салуды жалғастырып жатқанын қосты.
Цифрлық технологиялардың арқасында дәл жоспарлау мен болжамдық талдаудың нәтижесінде ел екінші жыл қатарынан астық өнімінің рекордтық көрсеткішіне — 27 млн тоннаға қол жеткізді.
Сөз соңында Президент жасанды интеллектті дамытудың және цифрлық егемендікті нығайтудың экономика мен мемлекеттің ұзақ мерзімді тұрақтылығы үшін маңызын атап өтті.